open la, jan li pali e kulupu utala. jan pi mama sama taso li lon kulupu la, kulupu li lili. jan li moli la kulupu li moli. tenpo la mute kulupu li lili, taso kulupu awen li kama suli. tenpo mute la, kulupu mute lili li utala e kulupu wan suli. ni la, jan pi mama sama ala li open lon kulupu sama.
open la jan, li kepeken nimi ala. jan li sona e ante jan tan lukin taso. jan li wile ala ike e toki pona. utala li ante e ni. pilin jan la, ona li suli la nimi ona o ante. jan li lon e nimi sin. jan nanpa wan lon ni li kepeken nimi Ete.
jan Ete li ante. jan ale li wile anpa e jan ike. jan ale li sona ala e ni: ona li pini anpa e jan ike la, ona o seme? ona li anpa e jan ike sin, e jan ike sin, e jan ike sin… sike la ni. pini la jan ike li moli e ona.
jan Ete li wile ala anpa e jan ike. ona li wile wawa li wile suli, li wile lawa e jan ante. utala la ona li alasa sona e ale pi jan ante, li utala kepeken sona ni. nasin ni la, jan Ete li pali e kulupu suli nanpa wan, li lawa e ma mute mute a! sona li wawa!
jan mute li pilin monsuta tan jan Ete, li alasa pona tawa ona. jan mute kin li wile moli e ona. jan Sima en jan Toso li wile wawa sama jan Ete. ona tu li kulupu e ma mute. a, utala suli li open!
jan Toso li kama e jan wawa mute lon poka ona. jan wan lon ni li jan Wala. ona li sona utala kepeken sona kin. jan Wala li lawa e kulupu utala lili, li pakala mute e kulupu Ete. taso, suno wan la, kulupu Ete li anpa e kulupu Wala. ona li awen e jan Wala lon poki lon anpa ma.
taso jan Ete li sona e suli pi jan Wala, li wile toki tawa ona. ona tu li toki e utala e lawa e wile suli. jan Ete li monsuta ala e jan Wala. mute la, ona tu li sama. pini toki la, jan Ete li toki e ni: “o awen pona, o moli ala! sina ken lawa e ma ale. pini ale la, mi tu li toki lon tenpo sin.” jan Wala li sona ala e tan pi toki ni.
jan Wala li awen lon poki lon tenpo mute. taso pini la ona li weka, li tawa ma Toso. ike la, jan Toso li moli. jan Sima li toki tawa jan Wala: jan Wala o lawa e ma Toso. jan Sima li wile lon e kulupu sin. kulupu sin o wan e ma mute, o moli e jan Ete. jan Wala taso li ken e ni.
jan Wala en jan Sima li lawa e kulupu utala suli a! ona li utala e ma tomo lawa pi jan Ete. utala li awen lon suno mute lon pimeja mute. jan mute a li moli. pini la, jan Wala li lon sinpin pi jan Ete ona o moli e jan Atawi. taso ona li ken ala. jan Ete li pona tawa ona. lon la, ona tu li sama. ona li kulupu e jan ale li pini e utala. jan Wala li toki: “mi tu li wan la, mi ken lawa e ale. jan ala li ken pini e wawa ni!”
ma Wala en ma Ete li wan lon kulupu sama. jan mute li pilin ike tan ni, li utala e kulupu sin. jan mute li pilin pona tan wawa, li utala e jan pi pilin ike. jan Sima li lon kulupu sin, taso ona li awen pilin ike tan jan Ete. jan Wala li alasa weka e utala ale lon insa kulupu.
jan Ete li mute e wawa ona lon ma Wala. ona li pana e jan pi mama sama tawa lawa ma. jan Sima li pilin e ike. ona li toki e pilin tawa jan lawa Wala. jan Ete li kama sona e ni la, ona li wile weka e jan Sima. jan Sima li ken ala e wawa ona. ona li kama e ni: jan pi mama sama li moli e jan Sima li len e sijelo. lukin la, jan Sima li moli tan pakala. taso, jan pali li lon tomo poka, li lukin e moli kepeken lupa lili.
jan pali li toki e ale tawa jan lawa. ona li pilin ike a tan moli pi jan Sima, li wile sona e tan. jan Wala en jan Ete en jan pi mama sama li kulupu. jan Ete li toki e ni: “jan Sima li len e ike ona. lon la ona li wile moli e sina!” taso jan Wala li toki: “jan Sima li pona a tawa lawa mi tawa pilin mi. ona li wile e ike ala. sina taso li lon e ike tan wile wawa. sina wile lawa e mi la sina kama e moli ona!” jan Ete li wile toki sin, taso wawa la jan Wala li moli e jan pi mama sama. “sina moli e jan mi la, mi moli e jan sina.”
jan Ete li pilin utala a! ona li alasa moli e jan Wala, taso jan Wala li weka. jan Wala li toki tawa kulupu ona: “o moli e jan Ete!” taso jan mute lon kulupu li tan ma Ete. jan Ete li kama li toki tawa kulupu: “o moli e jan Wala!” kulupu li tu li utala. jan ala li ken awen.
jan Ete en jan Wala li utala lon tenpo mute. kulupu li utala e ona sama la jan ante ala li lon. jan Ete li weka e sike lukin wan tan jan Wala; jan Wala li weka e luka wan tan jan Ete. tenpo sama la, kulupu li pini e utala. kulupu pi jan Ete li tawa ma ona. kulupu pi jan Wala li kama. jan Ete li anpa.
jan Wala li wile moli e jan Ete, taso ona li awen ken ala. ona li weka e sike lukin wan tan jan Ete, li toki: “o tawa ma sina, o kama sin ala.”
jan Ete li weka. pakala li suli. jan pona mute li moli. jan Ete li pilin ike a! tenpo mute la ona li utala ala. taso ona li pali. utala li pini ala.