sewi li suno la, ona li kama lukin e ma e telo pi nasin ike. ona li wan e ma ale, li nasin mute e ma, li pana e telo tawa poka ma.
pini la sewi li toki: ‘ijo o mute o mama, o kule e ma’. ona li lon e kasi. taso kasi li sama sewi ala, li wile e moku, li moku e telo.
telo li ike. sewi li toki tawa telo: ’nasin sina li ike la, mi ante e sina sama ma. sina o wan ala. telo o mute, la mi mute e sina. sama kasi la telo o mama o moli, la suno mi li moli e sina. moli sina li mama e kon; kon li awen lon sewi, li mama e telo sin. telo sin li tawa telo suli pi sin ala li sin e ona, li tawa kasi ma kin. ni la kasi li ken moku.’
ni ale li kama lon. telo li mute li moli li mama li ante, sama ijo ale pi pali sewi. ni li pona tawa ma, li ike tawa telo. telo li toki: ‘mi o ni ale tan seme? ni li pona ala e telo, li pona e ma taso. ma li jaki e mi. o lukin e mi a! telo li kule jaki.’
ni li lon. sewi li toki: ‘o ante o tawa, o tawa e jaki ma, o kama suwi. mi pana e kala tawa sina. ona li tawa e sina. kala suli o lon anpa sina o tawa suli e sina. kala lili li lon kin!’
ni la kala li kama lon, li tawa e telo li weka e jaki. telo li kama laso, li suwi, li pilin pona, li toki: ‘sewi o! open la mi pilin ike, taso sina pona e mi. sina suli ale a!’