jan Kisote li kama jan utala la ona li pilin pona a. taso, sin la ona li wile tawa tomo, li wile kama e mani e len e jan jo.
tawa la jan Kisote li kute e kalama pi pilin ike tan ma kasi. jan Kisote li toki:
—sewi li pona. utala li lon la mi ken kepeken wawa mi.
ma kasi la, ona li lukin e jan lili. linja li wan e jan e palisa kasi; jan li jo e len ala lon selo, li mu tan pilin ike. jan suli li pakala e selo pi jan lili kepeken linja. jan lili li toki:
—mi pali ike sin ala a. sewi o kute. mi ni sin ala a.
jan Kisote li lukin li toki:
—jan ike o! o utala ala e jan pi ken utala ala. o jo e ilo o utala e mi, la sina ken kama sona e weka wawa sina.
jan suli li lukin e ilo utala pi jan Kisote, li pilin monsuta. ona li toki:
—jan pona o, mi pana e mani tawa jan lili ni la ona o awen e soweli mi, taso ike la ona li weka e soweli. ona la, mi pana e mani pi mute lili. mi utala e ona tan ni.
—o pana e mani pi mute pona, o weka e linja tan jan lili. ante la mi moli e sina.
jan suli li weka e linja, taso mani li awen lon tomo la jan suli o tawa tomo. jan lili o kama lon poka ona. jan lili li wile ala, li toki tawa jan Kisote:
—sina weka la, jan ike ni li utala sin e mi a!
—jan suli o pana e mani o pini e utala. sina ni ala la mi kama sin, li moli e sina.
jan suli li toki e «mi o ni». jan Kisote li weka. taso, weka la, sin la jan suli li wan e jan lili e palisa kepeken linja, li utala a e ona li pana ala e mani.
pilin pona a la, jan Kisote li awen tawa. nasin li kama tu. nasin seme li pona la jan Kisote li sona ala. ona li pini tawa li alasa sona e nasin pona. pini la, ona li wile e ni: soweli Losinante o tawa; nasin soweli li pona nanpa wan.
jan Kisote li awen tawa, li kama lukin e kulupu suli. jan kulupu li wile esun e len lon ma Musija. taso jan Kisote la, ona li kulupu utala. jan Kisote li tawa kulupu li toki pi pilin utala:
—jan ale o pini tawa, o toki e ni: meli Jansuwi li suwi nanpa wan.
jan kulupu li lukin e jan Kisote e nasa ona, taso ona li toki:
—mi sona ala e meli ni la, mi ken ala sona e lon ni. o kama e ona; ni la mi ken lukin li ken sona.
—jan ike o, sina lukin anu lukin ala la ni li suli ala. mi toki e lon. lon li ken ala lon ala. sina ken ala lukin e sewi, taso sina sona e lon sewi.
—jan utala o, kulupu la jan ala li sona e meli ni. mi lukin ala e ona la, seme la mi ken sona e ona? o kama e meli.
—sina toki ike a. o moli.
jan Kisote li tawa utala e jan kulupu kepeken soweli Losinante. taso soweli li anpa tan kiwen nasin. jan Kisote li kama lon anpa soweli, li ken ala tawa, li toki:
—o weka ala, jan jaki o!
jan kulupu li wile ala awen kute e toki ike, li pakala e jan Kisote kepeken ilo utala. pini la ona li weka. jan Kisote li taso li ken ala tawa.