pilin ni li utala e jan Kisote. moku li pini la ona li kama anpa tawa mije li toki:
—jan pona o, sina lon ala e wile mi la mi pini anpa ala.
mije li lukin li kute e ona. ona o toki e seme la, ona li sona ala. ona li toki e ni: jan Kisote o pini anpa. jan Kisote li wile ni ala. pini la, mije li lon e wile. jan Kisote li toki:
—sina pali pona sama pona sina a. wile mi li ni: suno kama la sina jan utala e mi kepeken nasin lawa. tenpo lape pi suno ni la mi awen e ilo mi. suno kama la wile mi li lon la mi tawa ma ale li alasa e utala sama jan utala ale.
mije li pini kama sona e nasa pi jan Kisote. ona li wile e musi la, ona li toki sama wile pi jan Kisote: —wile sina li pona a! mi lili la mi jan utala kin. mi tawa utala lon ma Malaka, lon ma Lijala, lon ma Sepila, lon ma Sekowija, lon ma Walensija, lon ma Wanala, lon ma Sanluka, lon ma Kotopa, lon ma Toleto lon ma ante. mi pana e pona mute. mi utala e ike mute. mi kama suli lon tomo mute lon ale pi ma Epanja. pini la mi lape lon tomo suli ni. mi kama e jan utala sin ale li pana e pona tawa ona —mije li toki e lon ala li musi taso—.
mije li wile sona e ni: jan Kisote li jo ala jo e mani? jan Kisote li jo ala. jan Kisote la, lipu la jan utala li jo ala e mani. mije la jan utala ale li jo e mani e len suwi e misikeke lon poki. taso, pilin pi mama lipu la, jan ale li sona e ni la mani en len li wile ala lon lipu. kin la, jan utala ale li poka e jan jo; jan ni li jo e ijo ale pi jan utala.
jan Kisote o ni lon tenpo kama. tenpo pimeja li lon la ona li tawa awen e ilo lon tomo soweli.
mije li toki e nasa pi jan Kisote tawa jan ale lon tomo. jan pali li kama li pana e telo tawa soweli. ilo pi jan Kisote li pini e lupa pi tomo telo la jan pali li weka e ilo. jan Kisote li toki wawa:
—sina o! mi sona ala e sina. taso sina luka e ilo utala pi jan utala wawa nanpa wan! sina luka sin la mi moli e sina.
jan pali li kute ala, li weka e ilo. meli Jansuwi li lon pilin ona la, jan Kisote li lukin e sewi, li toki:
—meli mi o awen e mi, lon utala ni nanpa wan; olin suli sina o anpa ala e mi.
jan Kisote li jo e ilo li utala a e jan pali. jan pali li anpa. sin la jan Kisote li awen e ilo. jan pali sin li kama li wile pana e telo tawa soweli, li sona ala e jan Kisote, li weka sin e ilo. jan Kisote li utala a e jan pali sin. tan kalama utala la jan ale tomo li kama. jan Kisote li toki:
—meli suwi mi o! o lukin e utala ni pi wile wawa suli.
wawa li kama tawa ona tan toki ni. kulupu jan li lukin e jan pali tu lon anpa la ona li pana utala e kiwen tawa jan Kisote. mije li alasa pini e utala, li toki sin e nasa pi jan Kisote. jan Kisote li toki jaki tawa kulupu.
—kulupu ike o, mi kute ala e sina. o pana o utala o jaki e mi; sina taso li kama ike tan ike.
toki ni li monsuta e kulupu. tan ni tan toki mije la kulupu li pini utala. sin la jan Kisote li tawa awen e ilo.
mije li wile ala e utala, li wile weka e jan Kisote. ona li toki: —o pilin ike ala tan ike pi jan jaki ni. sina awen pona e ilo sina la, mi ken jan utala e sina.
mije li toki tan lipu sewi, li luka tu e jan Kisote. meli li telo e ilo, li toki:
—sewi o pana e pona tawa sina a.
jan Kisote li wile sona e nimi meli. meli li kepeken nimi Tolosa. jan Kisote la nimi ona o «meli Tonja Tolosa».* toki Epanjo pi tenpo weka la, meli mani li kepeken nimi namako «Tonja» (doña). sama la mije li kepeken nimi «Ton» (don). musi la jan Kisote li kepeken ike e nimi ni. meli sin li telo e len. sin la jan Kisote li wile sona e nimi meli. ona li meli Molinela. jan Kisote la nimi ona o «meli Tonja Molinela».
jan Kisote li kama jan utala tawa lawa. ona li toki e «o awen pona» tawa mije, li weka kepeken soweli Losinante.